సిరిసిల్లలో మోగిన రైలు కూత: బస్వాపూర్ వరకు విజయవంతంగా రైల్వే ట్రయల్ రన్
మనోహరాబాద్-కొత్తపల్లి నూతన రైల్వే లైన్ నిర్మాణంలో మరో మైలురాయి నమోదైంది. రాజన్న సిరిసిల్ల జిల్లా తంగళ్లపల్లి మండలం బస్వాపూర్ రైల్వే స్టేషన్ వరకు రైల్వే అధికారులు నిర్వహించిన ట్రయల్ రన్ విజయవంతమైంది. సిద్దిపేట వైపు నుంచి బస్వాపూర్ వరకు రైలు ఇంజిన్ను నడిపి నూతనంగా నిర్మించిన పట్టాలు, సిగ్నలింగ్ వ్యవస్థ, ఇతర సాంకేతిక ఏర్పాట్ల పనితీరును క్షేత్రస్థాయిలో పరిశీలించారు.
పరిశ్రమలకు, భక్తులకు బిగ్ రిలీఫ్
దశాబ్దాల నిరీక్షణ తర్వాత తొలిసారిగా తమ ప్రాంతానికి రైలు రావడంతో స్థానిక ప్రజలు, రైతులు మిఠాయిలు పంచుకుని సంబరాలు చేసుకున్నారు. ఈ రైల్వే మార్గం పూర్తిస్థాయిలో అందుబాటులోకి వస్తే సిరిసిల్ల చేనేత, జౌళి పరిశ్రమ ఉత్పత్తుల రవాణా అత్యంత సులభతరం కానుంది. అంతేకాకుండా ప్రముఖ పుణ్యక్షేత్రమైన వేములవాడ శ్రీ రాజరాజేశ్వర స్వామి ఆలయానికి వచ్చే భక్తులకు మెరుగైన రవాణా సౌకర్యం లభిస్తుంది.
త్వరలోనే పూర్తి స్థాయి సర్వీసులు
సిరిసిల్ల పట్టణ శివారు వరకు రైల్వే లైన్ నిర్మాణ పనులను త్వరితగతిన పూర్తి చేసి, ప్రయాణికుల రైళ్లను అందుబాటులోకి తీసుకురావడానికి చర్యలు వేగవంతం చేస్తున్నట్లు రైల్వే అధికారులు వెల్లడించారు. బస్వాపూర్ వరకు ట్రయల్ రన్ విజయవంతం కావడంతో జిల్లావాసుల సుదీర్ఘ స్వప్నం సాకారమయ్యేందుకు మరో అడుగు ముందుకు పడింది.
గంగాధర వద్ద ఘోర రోడ్డు ప్రమాదం: ఆటోను ఢీకొట్టిన వ్యాన్, మహిళా కూలీ మృతి
