ఆర్టీసీ బస్సులో మంత్రుల సడన్ సర్ప్రైజ్: విద్యార్థులు, మహిళలతో పొన్నం ప్రభాకర్ ముచ్చట్లు
కరీంనగర్ :
తెలంగాణ ప్రజా ప్రభుత్వంలో ఆర్టీసీ రూపురేఖలు మారిపోయాయని, మహిళలకు ఉచిత ప్రయాణమే కాకుండా వారిని బస్సుల యజమానులుగా మార్చిన ఘనత సీఎం రేవంత్ రెడ్డి నాయకత్వానికే దక్కుతుందని రవాణా శాఖ మంత్రి పొన్నం ప్రభాకర్ పేర్కొన్నారు. కరీంనగర్ లోని వాగేశ్వరి ఇంజనీరింగ్ కాలేజీ నుండి ఎన్టీఆర్ విగ్రహం వరకు మంత్రి పొన్నం ప్రభాకర్, ప్రభుత్వ విప్ అడ్లూరి లక్ష్మణ్ కుమార్తో కలిసి సాధారణ ప్రయాణికుడిలా ఆర్టీసీ బస్సులో ప్రయాణించారు.
ఈ ప్రయాణంలో బస్సులోని విద్యార్థులు, మహిళా ప్రయాణికులతో మంత్రులు నేరుగా మాట్లాడి వారి సాధకబాధకాలను అడిగి తెలుసుకున్నారు.
ఆర్టీసీ బలోపేతం – కొత్త బస్సుల చేరిక
బస్సులో ప్రయాణికులతో మాట్లాడిన అనంతరం మంత్రి పొన్నం ప్రభాకర్ మీడియాతో మాట్లాడారు.
-
మహాలక్ష్మి పథకం విజయం: మహాలక్ష్మి ఉచిత బస్సు ప్రయాణ పథకం ద్వారా ఒక్కో మహిళ నెలకు రూ. 2,000 నుండి రూ. 3,000 వరకు ఆదా చేసుకుంటోంది. దీనివల్ల ప్రయాణికుల రద్దీ విపరీతంగా పెరిగిందన్నారు.
-
కొత్త బస్సులు, రూట్లు: పెరిగిన రద్దీకి అనుగుణంగా స్కూల్, కాలేజీల సమయాల్లో అదనపు బస్సులు నడుపుతున్నాం. ఎన్నో కొత్త రూట్లను అందుబాటులోకి తెచ్చాంచ్చామని తెలిపారు. గత ప్రభుత్వం ఆర్టీసీని నిర్వీర్యం చేయాలని చూస్తే, మా ప్రభుత్వం కొత్త బస్సులను కొనుగోలు చేసి లాభాల బాట పట్టిస్తోంది. ప్రస్తుతం తెలంగాణ ఆర్టీసీ దేశంలోనే నెంబర్ వన్ ప్రజా రవాణా వ్యవస్థగా నిలిచింది.
-
కార్మికుల సంక్షేమం: ఆర్టీసీ డ్రైవర్లు, కండక్టర్ల సమస్యలను పరిష్కరిస్తున్నాం. పీఆర్సీ ప్రకటించడంతో పాటు గుర్తింపు సంఘాల ఎన్నికల ప్రక్రియను ప్రారంభించాం. ఎన్నికలు పూర్తి కాగానే గెలిచిన సంఘాలతో విలీన ప్రక్రియను పూర్తి చేస్తాం. ప్రయాణికులతో సిబ్బంది ఎల్లప్పుడూ ప్రేమపూర్వకంగా నడుచుకోవాలని సూచించారు.
గుడ్న్యూస్: ‘నీట్’ విద్యార్థులకు ఉచిత ప్రయాణం!
జూన్ 21న జరిగే ‘నీట్’ (NEET) పరీక్షకు హాజరయ్యే విద్యార్థులకు హాల్ టికెట్ చూపిస్తే ఉచిత ప్రయాణ సదుపాయం కల్పించే అంశాన్ని ముఖ్యమంత్రి రేవంత్ రెడ్డి దృష్టికి తీసుకెళ్లి నిర్ణయం తీసుకుంటామని మంత్రి పొన్నం ప్రభాకర్ హామీ ఇచ్చారు. అలాగే ఆటో కార్మికులు కూడా తమ ఉద్యమకారులేనని, వారి సంక్షేమానికి ప్రభుత్వం కట్టుబడి ఉందన్నారు.
విద్యా రంగానికి పెద్దపీట.. సంక్షేమ పాలన!
విద్యా, వైద్య రంగాలు, ఉపాధి అవకాశాలే లక్ష్యంగా ప్రభుత్వం ముందుకు సాగుతోందని మంత్రి వివరించారు.
-
గురుకుల పాఠశాలల్లో మెస్, కాస్మొటిక్ ఛార్జీలను పెంచడం జరిగిందని, నాణ్యమైన విద్యను అందిస్తున్నామని చెప్పారు.
-
ఈ ఏడాది నుండే ప్రభుత్వ స్కూళ్లలో ప్రీ-ప్రైమరీ తరగతులతో పాటు, ఉదయం పూట బ్రేక్ఫాస్ట్, పాలు అందించే పథకాన్ని ప్రారంభించినట్లు తెలిపారు.
-
200 యూనిట్ల ఉచిత విద్యుత్, రూ. 500లకే గ్యాస్ సిలిండర్, సన్న బియ్యం పంపిణీ, కొత్త రేషన్ కార్డులు, ఉద్యోగ నియామకాలు, రైతు భరోసా, రుణమాఫీ వంటి ఎన్నో చారిత్రాత్మక పథకాలతో దేశంలోనే తెలంగాణను సంక్షేమ రాష్ట్రంగా నిలబెట్టామని మంత్రి స్పష్టం చేశారు.
////////////////////////////////////////////////////////////
రాజన్న సిరిసిల్ల: బాలికపై అఘాయిత్యం, హ*త్య కేసులో నిందితుడికి యావజ్జీవ శి*క్ష!
రాజన్న సిరిసిల్ల :
మైనర్ బాలికపై లైం*గిక దాడికి పాల్పడటమే కాకుండా, ఆపై విషమిచ్చి దారుణంగా హ*త్య చేసిన కేసులో నిందితుడికి కోర్టు సంచలన తీర్పునిచ్చింది. నిందితుడు నవీన్ కుమార్ (27)కు పోక్సో (POCSO) కేసులో 20 ఏళ్ల కఠిన కారాగార శిక్ష, హ*త్య కేసులో యావజ్జీవ శిక్ష విధిస్తూ సిరిసిల్ల పోక్సో ప్రత్యేక కోర్టు న్యాయమూర్తి రాధికా జైస్వాల్ బుధవారం తుది తీర్పు వెలువరించారు.
అసలేం జరిగిందంటే..?
ప్రాసిక్యూషన్ కథనం ప్రకారం.. జగిత్యాల జిల్లా కొడిమ్యాల మండలం శ్రీరాములపల్లికి చెందిన బండపల్లి నవీన్ కుమార్కు, చందుర్తి మండలంకి చెందిన ఒక మైనర్ బాలికతో పరిచయం ఏర్పడింది.
-
2019 మార్చి 13న నిందితుడు సదరు బాలికను అపహరించి లైం*గిక దాడికి పాల్పడ్డాడు. బాధితురాలి తండ్రి ఫిర్యాదుతో చందుర్తి పోలీసులు అప్పట్లో పోక్సో కేసు నమోదు చేసి, దర్యాప్తు జరిపి చార్జిషీట్ దాఖలు చేశారు.
-
ఈ కేసు నడుస్తుండగానే, 2020 డిసెంబర్ 4న నిందితుడు మళ్లీ బాలికను ఇంటి నుండి అపహరించి గ్రామ శివారుకు తీసుకెళ్లాడు. అక్కడ మరోసారి అఘా*యిత్యానికి ఒడిగట్టాడు. ఈ విషయం బయటకు చెబితే జైలుకు వెళ్లాల్సి వస్తుందనే భయంతో బాలికకు బలవంతంగా వి*షం తాగించాడు. తీవ్ర అస్వస్థతకు గురైన బాలికను కరీంనగర్ ప్రభుత్వ ఆస్పత్రికి తరలించగా, అక్కడ చికిత్స పొందుతూ ఆమె ప్రాణాలు విడిచింది.
దీనిపై వేములవాడ టౌన్ పోలీసులు హ*త్య, లైంగికదాడి కింద కేసు నమోదు చేసి శాస్త్రీయ ఆధారాలు, వైద్య నివేదికలతో కోర్టులో పక్కాగా చార్జిషీట్ సమర్పించారు.
కోర్టు విధించిన శిక్షల వివరాలు:
సిరిసిల్ల పోక్సో ప్రత్యేక కోర్టులో ఈ రెండు కేసుల విచారణ జరిగింది. సాక్ష్యాధారాలను పరిశీలించిన న్యాయస్థానం నిందితుడిపై నేరం రుజువైందని నిర్ధారిస్తూ క్రింది విధంగా శిక్షలు ఖరారు చేసింది.
పోలీస్ బృందానికి ఎస్పీ అభినందనలు
నిందితుడికి కఠిన శిక్ష పడేలా శాస్త్రీయ ఆధారాలు సేకరించి, పకడ్బందీగా దర్యాప్తు చేసిన అప్పటి డీఎస్పీ వెంకటరమణ, ఇన్స్పెక్టర్ వెంకటేష్, కోర్టు కానిస్టేబుళ్లు మహేందర్, లతీఫ్, నవీన్, వెన్నెలను జిల్లా ఎస్పీ మహేష్ బి. గితే ప్రత్యేకంగా అభినందించారు.
//////////////////////////////////////
సిరిసిల్లలో కలకలం: పానీపూరి తిని 24 మంది చిన్నారులకు తీవ్ర అస్వస్థత
తంగళ్ళపల్లి :
రాజన్న సిరిసిల్ల జిల్లా తంగళ్ళపల్లి మండలం కేసీఆర్ నగర్ కాలనీలో దారుణ ఘటన వెలుగుచూసింది. కాలనీలో పానీపూరి తిన్న 24 మందికి పైగా చిన్నారులు ఒక్కసారిగా తీవ్ర అస్వస్థతకు గురయ్యారు. బుధవారం వారందరినీ అత్యవసర చికిత్స నిమిత్తం జిల్లా కేంద్రంలోని ప్రభుత్వ ఆసుపత్రికి తరలించారు.
ఫుడ్ పాయిజన్ వల్లేనా..?
పానీపూరి తిన్న కాసేపటికే చిన్నారులకు విపరీతమైన కడుపునొప్పి, వాంతులు, విరేచనాలు ప్రారంభమయ్యాయి. ఆసుపత్రిలో చేరిన వారిలో ఒక చిన్నారికి జ్వర తీవ్రత ఎక్కువై ‘ఫిట్స్’ రావడంతో తల్లిదండ్రులు తీవ్ర ఆందోళనకు గురవుతున్నారు. ప్రస్తుతం వైద్యుల పర్యవేక్షణలో పిల్లలందరికీ అత్యవసర చికిత్స అందుతోంది. అయితే ఈ అస్వస్థతకు పానీపూరిలో వాడిన కలుషిత నీరే కారణమా (ఫుడ్ పాయిజన్)? లేక మరేదైనా ఇతర కారణం ఉందా? అనే కోణంలో అధికారులు దర్యాప్తు చేస్తున్నారు. ఈ ఘటన స్థానికంగా తీవ్ర చర్చనీయాంశంగా మారింది.
బాధితులను పరామర్శించిన ఆర్డీఓ, రాజకీయ నేతలు
విషయం తెలుసుకున్న సిరిసిల్ల ఆర్డీఓ (RDO) శ్రీధర్ బాబు బుధవారం ప్రభుత్వ ఆసుపత్రికి చేరుకుని చిన్నారులను పరామర్శించారు. వారి ఆరోగ్య పరిస్థితిని అడిగి తెలుసుకున్నారు.
-
మెరుగైన వైద్యం అందించాలి: చిన్నారులకు ఎలాంటి ప్రాణాపాయం లేకుండా మెరుగైన వైద్య సేవలు అందించాలని ఆర్డీఓ వైద్యాధికారులను ఆదేశించారు. ఎప్పటికప్పుడు పిల్లల హెల్త్ అప్డేట్స్ అందించాలని, ఆసుపత్రిలో ఉన్న తల్లిదండ్రులకు అవసరమైన కనీస సదుపాయాలు కల్పించాలని సూచించారు.
-
నేతల పరామర్శ: ఆర్డీఓతో పాటు కాంగ్రెస్ పార్టీ మండల అధ్యక్షుడు జలగం ప్రవీణ్ కుమార్, బీఆర్ఎస్ మండల అధ్యక్షుడు గజబిన్కర్ రాజన్న సహా ఇరు పార్టీల ముఖ్య నాయకులు ఆసుపత్రికి చేరుకుని బాధితుల కుటుంబాలకు ధైర్యం చెప్పారు
////////////////////////////////////////////////////////////////////////////////////////
మల్కాపూర్కు కొత్త బస్సు సర్వీస్: ప్రారంభించిన ఎమ్మెల్యే మేడిపల్లి సత్యం
బోయినిపల్లి:
గ్రామీణ ప్రాంత ప్రజలకు రవాణా కష్టాలు తీర్చడమే ధ్యేయంగా ప్రభుత్వం ముందుకు సాగుతోందని చొప్పదండి ఎమ్మెల్యే డాక్టర్ మేడిపల్లి సత్యం స్పష్టం చేశారు. రాజన్న సిరిసిల్ల జిల్లా బోయినిపల్లి మండలం మల్కాపూర్ గ్రామానికి మంజూరైన నూతన టీజీఎస్సార్టీసీ (TGSRTC) బస్సు సర్వీసును ఆయన గురువారం ఆకుపచ్చ జెండా ఊపి ఘనంగా ప్రారంభించారు.
బస్సు నడిచే రూట్ వివరాలు:
ఈ కొత్త బస్సు సర్వీస్ ప్రయాణికులకు ఎంతో అనుకూలంగా ఉండనుంది. ఇది కింది ప్రధాన ప్రాంతాల మీదుగా రాకపోకలు సాగిస్తుంది:
-
కరీంనగర్ ➡️ మల్కాపూర్ ➡️ గంగాధర ➡️ తిప్పాయిపల్లి మీదుగా ప్రముఖ పుణ్యక్షేత్రమైన వేములవాడ వరకు ఈ బస్సు ప్రయాణికులకు అందుబాటులో ఉంటుంది.
రవాణా సౌకర్యాల మెరుగుదలే లక్ష్యం
ఈ సందర్భంగా ఎమ్మెల్యే మేడిపల్లి సత్యం మాట్లాడుతూ.. పల్లె ప్రజలకు, విద్యార్థులకు మెరుగైన, సురక్షితమైన ప్రయాణ సౌకర్యాలు కల్పించేందుకు ప్రభుత్వం కట్టుబడి ఉందన్నారు. గ్రామీణ రూట్లలో ప్రజల అవసరాలకు అనుగుణంగా మరిన్ని బస్సులు నడిపేలా చర్యలు తీసుకుంటామని హామీ ఇచ్చారు. ఈ సరికొత్త బస్సు సర్వీసును గ్రామస్తులు, ప్రయాణికులు సద్వినియోగం చేసుకోవాలని కోరారు.
ఈ కార్యక్రమంలో వేములవాడ ఆర్టీసీ డిపో మేనేజర్ (DM) బోనాల శ్రీనివాస్, బోయినిపల్లి మండల కాంగ్రెస్ పార్టీ అధ్యక్షుడు కొమ్మనబోయిన సువీన్ యాదవ్తో పాటు స్థానిక ప్రజాప్రతినిధులు, పెద్ద సంఖ్యలో గ్రామస్తులు పాల్గొన్నారు.
////////////////////////////////////
స్కూల్ బస్సు డ్రైవర్లు రూల్స్ పాటించాల్సిందే: గోదావరిఖని ఏసీపీ ఎం. రమేష్ హెచ్చరిక
రామగుండం
పాఠశాలలు, కళాశాలలకు చెందిన రవాణా వాహనాల డ్రైవర్లు రోడ్డు భద్రతా నియమాలను నూటికి నూరు శాతం పాటించాలని గోదావరిఖని ఏసీపీ ఎం. రమేష్ స్పష్టం చేశారు. విద్యార్థుల ప్రాణాలతో ముడిపడి ఉన్న ప్రయాణాల్లో ఎలాంటి అజాగ్రత్త వహించినా సహించేది లేదని ఆయన హెచ్చరించారు.
రామగుండం పోలీస్ కమిషనర్ అంబర్ కిషోర్ ఝా ఆదేశాల మేరకు.. పెద్దపల్లి జోన్ గోదావరిఖని సబ్డివిజన్ పోలీసుల ఆధ్వర్యంలో విద్యాసంస్థల యాజమాన్యాలకు, బస్సు డ్రైవర్లకు ఎన్టీపీసీ (NTPC) మిలీనియం హాల్లో ప్రత్యేక అవగాహన సదస్సు నిర్వహించారు. ఈ కార్యక్రమానికి ముఖ్య అతిథిగా హాజరైన ఏసీపీ ఎం. రమేష్ డ్రైవర్లు, యాజమాన్యాలకు పలు కీలక సూచనలు చేశారు.
డ్రైవర్లు, యాజమాన్యాలు పాటించాల్సిన నియమాలు:
-
నైపుణ్యం ఉన్నవారికే అవకాశం: విద్యాసంస్థల యాజమాన్యాలు కేవలం అనుభవజ్ఞులైన, డ్రైవింగ్ నైపుణ్యం మరియు లైసెన్స్ ఉన్న డ్రైవర్లను మాత్రమే నియమించుకోవాలి.
-
సురక్షిత బోర్డింగ్: విద్యార్థులను బస్సు ఎక్కించే సమయంలో, దించే సమయంలో నిర్దేశించిన సురక్షిత ప్రదేశాల్లోనే వాహనాలను నిలపాలి. రోడ్ల మధ్యలో ఆపడం నిషిద్ధం.
-
వేగ నియంత్రణ: డ్రైవర్లు ఎట్టి పరిస్థితుల్లోనూ అతివేగంగా వాహనాలు నడపకూడదు. రోడ్లపై ప్రమాదకరంగా ఓవర్టేకింగ్ చేయరాదు.
-
యాజమాన్యాలదే బాధ్యత: డ్రైవర్లు చేసే ఎలాంటి ట్రాఫిక్ ఉల్లంఘనలకైనా, తప్పిదాలకైనా సంబంధిత విద్యాసంస్థ యాజమాన్యమే పూర్తి బాధ్యత వహించాల్సి ఉంటుంది.
డ్రంక్ అండ్ డ్రైవ్, సెల్ఫోన్ వాడితే కఠిన చర్యలు!
మద్యం సేవించి స్కూల్ బస్సులు నడిపినా, లేదా డ్రైవింగ్ చేస్తూ సెల్ఫోన్ మాట్లాడినా చట్టప్రకారం కఠిన చర్యలు తీసుకుంటామని ఏసీపీ హెచ్చరించారు. విద్యార్థుల భద్రత విషయంలో పోలీసులు నిరంతరం నిఘా ఉంచుతారని తెలిపారు.
సదస్సులో పాల్గొన్న అధికారులు
ఈ అవగాహన సదస్సులో రామగుండం సీఐ కృష్ణకుమార్, మోటార్ వెహికల్ ఇన్స్పెక్టర్ (MVI) సంతోష్ రెడ్డి, ఎన్టీపీసీ ఎస్ఐ ఉదయ్ కిరణ్, రామగుండం ఎస్ఐ సంధ్యారాణి, రామగిరి ఎస్ఐ శ్రీనివాస్, ముత్తారం ఎస్ఐ రవికుమార్లతో పాటు పలు పాఠశాలలు, కళాశాలల ప్రిన్సిపాళ్లు, పెద్ద సంఖ్యలో బస్సు డ్రైవర్లు పాల్గొన్నారు.
