గ్రామాల అభివృద్ధిలో సర్పంచుల పాత్ర అత్యంత కీలకం: కలెక్టర్ చిత్రా మిశ్రా

కరీంనగర్: గ్రామాల అభివృద్ధిలో సర్పంచుల పాత్ర అత్యంత కీలకమని, విధులు మరియు బాధ్యతలను సక్రమంగా నిర్వర్తించి గ్రామాల స్వయం సమృద్ధికి కృషి చేయాలని కరీంనగర్ జిల్లా కలెక్టర్ చిత్రా మిశ్రా పిలుపునిచ్చారు. గురువారం జిల్లాలోని తిమ్మాపూర్ మండల కేంద్రంలో గల శ్రీ చైతన్య ఇంజనీరింగ్ కళాశాలలో సర్పంచులకు నిర్వహించిన “ప్రజా పాలన – ప్రగతి ప్రణాళిక” శిక్షణ కార్యక్రమంలో ఆమె ముఖ్య అతిథిగా హాజరై ప్రసంగించారు.

సర్పంచ్ పాత్రే కీలకం – 99 రోజుల కార్యాచరణ

బాపూజీ కలలుగన్న గ్రామ స్వరాజ్యం కోసం ప్రతి ఒక్కరూ పాటుపడాలని కలెక్టర్ పేర్కొన్నారు. “గ్రామానికి సర్పంచ్ సుప్రీం” అని ఉద్ఘాటిస్తూ, ప్రభుత్వం ప్రకటించిన 99 రోజుల కార్యాచరణలో అందరూ భాగస్వాములు కావాలని సూచించారు. 2018 పంచాయతీరాజ్ చట్టంపై సర్పంచులకు పూర్తి అవగాహన ఉండాలని, కేంద్ర రాష్ట్ర ప్రభుత్వాల నుంచి వచ్చే నిధులు, ఆదాయ-వ్యయాలు మరియు ప్రభుత్వ పథకాల అమలుపై పట్టు సాధించాలని ఆమె కోరారు.

 స‌ర్పంచ్‌ల‌కు అభివృద్ధికి దిశానిర్దేశం:

• జీవన ప్రమాణాలు: నాణ్యమైన విద్య, వైద్యం అందించడంతో పాటు పారిశుద్ధ్య సమస్యలు తలెత్తకుండా పకడ్బందీ చర్యలు చేపట్టాలి.

• ఆదాయ వనరులు: పన్నుల వసూలుతో పాటు గ్రామ పంచాయతీలు సొంతంగా ఆదాయం పెంచుకోవడంపై దృష్టి సారించాలి.

• సమస్యల పరిష్కారం: నిత్యం వార్డులను పర్యవేక్షిస్తూ, గ్రామసభలు నిర్వహిస్తూ ప్రజా సమస్యలను గుర్తించి వెంటనే పరిష్కరించాలి.

• అధికారుల సమన్వయం: అధికారులతో సమన్వయం చేసుకుంటూ గ్రామాలను ప్రగతి పథంలో తీర్చిదిద్దాలని, పది తరాలకు గుర్తుండిపోయేలా పని చేయాలని సూచించారు.

ప్రజా సమస్యల పరిష్కారమే లక్ష్యం: ఎమ్మెల్యే మేడిపల్లి సత్యం

చొప్పదండి ఎమ్మెల్యే మేడిపల్లి సత్యం మాట్లాడుతూ.. ప్రజల సమస్యలను నేరుగా తెలుసుకునేందుకే రాష్ట్ర ప్రభుత్వం ‘ప్రజా పాలన – ప్రగతి ప్రణాళిక’కు శ్రీకారం చుట్టిందన్నారు. ఇప్పటికే రైతులకు రూ. 2 లక్షల రుణమాఫీ, సన్న వడ్లకు బోనస్, మహిళలకు ఉచిత బస్సు ప్రయాణం వంటి పథకాలు అమలవుతున్నాయని గుర్తు చేశారు.

ప్రతి నియోజకవర్గానికి 3500 ఇందిరమ్మ ఇళ్ల నిర్మాణం చేపడుతున్నామని, కొత్త రేషన్ కార్డుల జారీ కూడా జరుగుతోందని తెలిపారు. పార్టీలకతీతంగా ప్రభుత్వం నుంచి పూర్తి సహకారం ఉంటుందని, సర్పంచులు బాగా పనిచేస్తేనే ప్రభుత్వానికి మంచి పేరు వస్తుందని ఆయన పేర్కొన్నారు.

సామాజిక భాగస్వామ్యం – సుడా చైర్మన్ పిలుపు

సుడా చైర్మన్ కోమటిరెడ్డి నరేందర్ రెడ్డి మాట్లాడుతూ.. గ్రామాల్లో ఆర్థికంగా స్థిరపడిన వారి సహకారం తీసుకుని పంచాయతీలను సుందరంగా తీర్చిదిద్దాలని నూతన సర్పంచులకు సూచించారు. అధికారులతో కలిసి గ్రామాభివృద్ధిలో భాగస్వాములు కావాలని కోరారు.

అవగాహన కార్యక్రమం: వివిధ శాఖల అధికారులు హాజరై 99 రోజుల కార్యాచరణలో చేపట్టాల్సిన పనులపై పవర్ పాయింట్ ప్రజెంటేషన్ ద్వారా సర్పంచులకు అవగాహన కల్పించారు. ఈ కార్యక్రమంలో అదనపు కలెక్టర్ లక్ష్మీ కిరణ్, ఆర్డీవో మహేశ్వర్, డిపిఓ జగదీశ్వర్, డిఎంహెచ్ఓ వెంకటరమణ, డిఆర్డిఓ శ్రీధర్, డీఏవో భాగ్యలక్ష్మి మరియు ఇతర శాఖల అధికారులు పాల్గొన్నారు.