bathukamma” రంగురంగుల బతుకమ్మ ఉయ్యాలో.. బ‌తుక‌మ్మ పాట‌ను ర‌చించిన రాజేశ్

bathukamma” బతుకమ్మ పండుగ
తెలంగాణ పూల పండుగ

మెరిసేటి తాంబాలంలో ఉయ్యాలో
గుమ్మడాకులు పరిచాను ఉయ్యాలో !
తీరొక్క పువ్వు ఉయ్యాలో
దారంతో అల్లిన ఉయ్యాలో !
రకరకాల రంగుల్లో ఉయ్యాలో
పూలన్ని ముంచిన ఉయ్యాలో !
తంగేడు పూలతో ఉయ్యాలో
తల్లులంత ఒక్క చోట ఉయ్యాలో !
ఇరుగు పొరుగు కలిసే ఉయ్యాలో
బతుకమ్మ ను పేర్చెను ఉయ్యాలో !
రంగురంగుల బతుకమ్మ ఉయ్యాలో
బంగారు బతుకమ్మ ఉయ్యాలో !
వెలిసిన కుసుమం ఉయ్యాలో
నిలువెత్తు నిదర్శనం ఉయ్యాలో!
బంగారు బతుకమ్మ ఉయ్యాలో
తోబుట్టువు నీవంట ఉయ్యాలో !
పూజగది లో బతుకమ్మ ఉయ్యాలో
మా పూజలందుకో ఉయ్యాలో !
సత్తులన్ని మూటకట్టి ఉయ్యాలో
బతుకమ్మను ఎత్తుకొని ఉయ్యాలో !
ఆడపడుచులు ఆనందంగా ఉయ్యాలో
బతుకమ్మ తో బయల్దేరెను ఉయ్యాలో !
ఊరు వాడ అంతా ఉయ్యాలో
ఊయలూగును గౌరమ్మ ఉయ్యాలో !
ఈ యాల ఈ పొద్దు ఉయ్యాలో
గుడి ముందు అందరూ ఉయ్యాలో !
ఒక్కేసి పువ్వేసి ఉయ్యాలో
అక్కాచెల్లెళ్ళ ఆట ఉయ్యాలో !
బతుకమ్మ బతుకమ్మ ఉయ్యాలో
బంగారు బతుకమ్మ ఉయ్యాలో !
కన్నుల పండుగ ఉయ్యాలో
పువ్వుల పండుగ ఉయ్యాలో !
పల్లె పట్నమంత ఉయ్యాలో
ఆనందం పంచెను ఉయ్యాలో !
సద్దుల బతుకమ్మ ఉయ్యాలో
సంతోషాలు తెచ్చెను ఉయ్యాలో !
గంగమ్మ ఒళ్ళో ఉయ్యాలో
గంధం పూసేను ఉయ్యాలో !
వెళ్ళిరా బతుకమ్మ ఉయ్యాలో
మళ్ళీ రా బతుకమ్మ ఉయ్యాలో !
మూటలోని సత్తులు ఉయ్యాలో
పలహారాలు పంచెను ఉయ్యాలో !
ఆనంద ప్రతి ఇంట ఉయ్యాలో
అందరి సంతోషం నీవంట ఉయ్యాలో !