వెంకటేశ్వర స్వామి వార్షిక బ్రహ్మోత్సవాలు వైభవంగా నిర్వహిస్తాం మంత్రి పొన్నం ప్రభాకర్

అధికారులు సమన్వయంతో ఏర్పాట్లు చేయాలి : మంత్రి పొన్నం ప్రభాకర్

కరీంనగర్ |  

కరీంనగర్ మార్కెట్ రోడ్డులోని శ్రీ లక్ష్మీ–పద్మావతి సమేత వేంకటేశ్వర స్వామి ఆలయ వార్షిక బ్రహ్మోత్సవాలను ఈ ఏడాది మరింత వైభవంగా నిర్వహిస్తామని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ తెలిపారు.

ఈనెల 23 నుంచి 30వ తేదీ వరకు నిర్వహించనున్న బ్రహ్మోత్సవాల ఏర్పాట్లపై సోమవారం జిల్లా కేంద్రంలోని వెంకటేశ్వర స్వామి ఆలయంలో సన్నాహక సమావేశం జరిగింది.

భక్తులకు ప్రశాంత వాతావరణంలో దర్శనం కల్పించాలి

ఈ సమావేశంలో మంత్రి పొన్నం ప్రభాకర్ మాట్లాడుతూ, బ్రహ్మోత్సవాల సందర్భంగా భక్తులు ప్రశాంతంగా స్వామివారి దర్శనం చేసుకునేలా అధికారులు అన్ని చర్యలు తీసుకోవాలని జిల్లా యంత్రాంగాన్ని ఆదేశించారు.

రాజకీయాలకు అతీతంగా బ్రహ్మోత్సవాలు నిర్వహిస్తున్నామని, పార్టీలకు సంబంధం లేకుండా ప్రజాప్రతినిధులందరూ ఈ వేడుకల్లో పాల్గొనాలని కోరారు.

ట్రాఫిక్, భద్రతపై ప్రత్యేక దృష్టి

గతేడాది మాదిరిగానే స్వామివారి సేవకు ముందుకు వచ్చి విరాళాలు అందజేస్తున్న దాతలకు మంత్రి కృతజ్ఞతలు తెలిపారు.
బ్రహ్మోత్సవాల సమయంలో ట్రాఫిక్ సమస్యలు తలెత్తకుండా పటిష్టమైన బందోబస్తు ఏర్పాటు చేయాలని సూచించారు. భక్తులకు అవసరమైన అన్ని మౌలిక సదుపాయాలు కల్పించడం జిల్లా అధికారుల బాధ్యత అని అన్నారు.

భక్తులకు ఎలాంటి ఇబ్బందులు ఉండకూడదు : సుడా చైర్మన్

సుడా చైర్మన్ కోమటిరెడ్డి నరేందర్ రెడ్డి మాట్లాడుతూ, వెంకటేశ్వర స్వామి బ్రహ్మోత్సవాలను వైభవంగా నిర్వహించేందుకు అన్ని శాఖలు ఆలయ అధికారులతో సమన్వయంతో పనిచేయాలని సూచించారు.
భక్తులు పెద్ద సంఖ్యలో హాజరై స్వామివారి ఆశీస్సులు పొందాలని కోరారు.

అన్ని శాఖల సమన్వయంతో ఏర్పాట్లు : జిల్లా కలెక్టర్

జిల్లా కలెక్టర్ పమేలా సత్పతి మాట్లాడుతూ, బ్రహ్మోత్సవాల నిర్వహణకు జిల్లా యంత్రాంగం అన్ని చర్యలు తీసుకుంటుందని తెలిపారు.

• నిరంతర విద్యుత్ సరఫరా

• సాంస్కృతిక కార్యక్రమాల నిర్వహణ

• వైద్య శిబిరం ఏర్పాటు

• ఆలయ పరిసరాల్లో శానిటేషన్, క్లీనింగ్

వంటి అంశాలపై ప్రత్యేక దృష్టి సారిస్తున్నామని తెలిపారు. ఈ సందర్భంగా పలువురు దాతలు బ్రహ్మోత్సవాల నిర్వహణకు విరాళాలను ప్రకటించారు.

సమావేశంలో పాల్గొన్నవారు

ఈ సమావేశంలో
ఆర్డీవో మహేశ్వర్,
కరీంనగర్ కోఆపరేటివ్ అర్బన్ బ్యాంక్ చైర్మన్ కర్రె రాజశేఖర్,
అడిషనల్ డీసీపీ వెంకటరమణ,
ఆలయ చైర్మన్లు చకిలం శ్రీనివాస్, చకిలం గంగాధర్,
ఏసీపీ వెంకటస్వామి,
ఈవో సుధాకర్ తదితరులు పాల్గొన్నారు.