జగిత్యాల జిల్లా ధర్మపురి పోలీస్ స్టేషన్ పరిధిలో జరిగిన ఒక దొంగతనం కేసును పోలీసులు అత్యంత వేగంగా ఛేదించారు. సాంకేతిక పరిజ్ఞానాన్ని ఉపయోగించి కేవలం 24 గంటల వ్యవధిలోనే నిందితుడిని అదుపులోకి తీసుకోవడమే కాకుండా, దొంగతనానికి గురైన బంగారం, వెండి ఆభరణాలతో పాటు ఒక ద్విచక్ర వాహనాన్ని కూడా సురక్షితంగా రికవరీ చేశారు.
అసలేం జరిగిందంటే..?
ధర్మపురి పట్టణానికి చెందిన లత అనే మహిళా తన నివాసంలో దొంగతనం జరిగినట్లు పోలీసులకు ఫిర్యాదు చేసింది. తన ఇంట్లో చొరబడిన గుర్తుతెలియని దుండగులు 2 తులాల బంగారు నగలు, అలాగే 14 తులాల వెండి ఆభరణాలను అపహరించుకుపోయారని ఆమె తన ఫిర్యాదులో పేర్కొంది. బాధితురాలి ఫిర్యాదుతో రంగంలోకి దిగిన ధర్మపురి పోలీసులు తక్షణమే కేసు నమోదు చేసి దర్యాప్తు ప్రారంభించారు.
సీసీటీవీ, టెక్నాలజీతో దొంగ చిక్కాడు!
ధర్మపురి సర్కిల్ ఇన్స్పెక్టర్ (CI) ఎ. రాంనర్సింహారెడ్డి పర్యవేక్షణలో, ఎస్ఐ జి. మహేష్ మరియు పోలీస్ సిబ్బంది ప్రత్యేక బృందాలుగా ఏర్పడ్డారు. ఘటనా స్థలంలోని క్లూస్, స్థానిక సీసీటీవీ (CCTV) ఫుటేజీలు మరియు సాంకేతిక ఆధారాలను (Technical Evidence) క్షుణ్ణంగా విశ్లేషించి నిందితుడిని గుర్తించి అరెస్టు చేశారు.
రికవరీ చేసిన సొత్తు: నిందితుడి వద్ద నుండి దొంగిలించబడిన 2 తులాల బంగారు నగలు, 14 తులాల వెండి ఆభరణాలను పోలీసులు పూర్తిగా స్వాధీనం చేసుకున్నారు.
పాత కేసు వెలుగులోకి: విచారణలో నిందితుడు గతంలో ఒక బైక్ దొంగతనానికి కూడా పాల్పడినట్లు ఒప్పుకోవడంతో, అతని వద్ద నుండి ఆ ద్విచక్ర వాహనాన్ని కూడా పోలీసులు సీజ్ చేశారు.
పోలీస్ సిబ్బందికి అభినందనలు:
కేసును అత్యంత వేగంగా ఛేదించి, దొంగిలించబడిన సొత్తును వంద శాతం రికవరీ చేసిన సీఐ రాంనర్సింహారెడ్డి, ఎస్ఐ మహేష్ మరియు సిబ్బందిని జగిత్యాల జిల్లా ఎస్పీ అశోక్ కుమార్ (IPS), డీఎస్పీ పురుషోత్తం రెడ్డి ప్రత్యేకంగా అభినందించారు.
ప్రజలకు పోలీసుల కీలక సూచనలు:
ఈ సందర్భంగా ప్రజలు అప్రమత్తంగా ఉండాలని పోలీసులు సూచించారు:
ఇళ్లకు తాళాలు వేసి దూరప్రాంతాలకు వెళ్లేటప్పుడు విలువైన బంగారం, నగదును ఇంట్లో ఉంచకుండా భద్రమైన చోట ఉంచుకోవాలన్నారు.
కాలనీల్లో ఎవరైనా అనుమానాస్పద వ్యక్తులు సంచరిస్తున్నట్లు గమనిస్తే వెంటనే డయల్–100 కు గానీ లేదా స్థానిక పోలీస్ స్టేషన్కు గానీ సమాచారం అందించాలి చె్ప్పారు.
