కరీంనగర్ : నగరంలో ట్రాఫిక్ నిబంధనలను ఉల్లంఘించే వాహనదారులపై పోలీసులు ఉక్కుపాదం మోపారు. శనివారం కరీంనగర్ వన్టౌన్ కార్నర్ జంక్షన్ వద్ద ట్రాఫిక్ పోలీసులు అకస్మాత్తుగా మెరుపు తనిఖీలు (స్పెషల్ డ్రైవ్) చేపట్టారు. నిబంధనలకు విరుద్ధంగా నడుపుతున్న ఏకంగా 115 వాహనాలను అక్కడికక్కడే సీజ్ చేశారు.
ట్రాఫిక్ ఏసీపీ యాదగిరిస్వామి పర్యవేక్షణలో.. ఇన్స్పెక్టర్లు సంజీవ్, అంజయ్య మరియు సిబ్బంది ఈ ఆపరేషన్లో పాల్గొన్నారు. నంబర్ ప్లేట్లు సరిగ్గా లేనివి, అసలు నంబర్ ప్లేట్లే లేని వాహనాలు, విరుద్ధమైన నంబర్లతో తిరుగుతున్న టూ వీలర్స్, ఫోర్ వీలర్లను గుర్తించి పోలీస్ స్టేషన్కు తరలించారు. మోటారు వాహనాల చట్టం ప్రకారం వారికి భారీగా జరిమానాలు విధించడంతో పాటు, వాహనదారులకు గట్టిగా కౌన్సెలింగ్ ఇచ్చారు.
నంబర్ ప్లేట్లతో ఆటలాడితే జైలుకే: ఏసీపీ హెచ్చరిక
ఈ సందర్భంగా ఏసీపీ యాదగిరిస్వామి మాట్లాడుతూ.. నగరంలో నేరాల నియంత్రణకు, ప్రజల భద్రతకు నంబర్ ప్లేట్లు అత్యంత కీలకమని స్పష్టం చేశారు. ప్రతి వాహనానికి ప్రభుత్వం నిబంధనల ప్రకారం జారీ చేసిన హైసెక్యూరిటీ రిజిస్ట్రేషన్ నంబర్ ప్లేట్ (HSRP) ఖచ్చితంగా ఉండాలని ఆదేశించారు.
ఫ్యాన్సీ నంబర్లు పెట్టడం, స్టిక్కర్లు వేసి నంబర్లు సరిగ్గా కనిపించకుండా చేయడం, లేదా నంబర్ ప్లేట్ లేకుండా తిరగడం చట్టరీత్యా నేరమని ఆయన హెచ్చరించారు. నగరంలో ఇలాంటి అక్రమ వాహనాలపై తనిఖీలు మున్ముందు కూడా నిరంతరం కొనసాగుతాయని, వాహనదారులు పోలీసులకు సహకరించాలని కోరారు. ఈ తనిఖీల్లో ట్రాఫిక్ ఎస్ఐలు, సిబ్బంది పెద్ద సంఖ్యలో పాల్గొన్నారు.
