వికారాబాద్ ప్రతినిధి: ప్రకృతి కన్నెర్ర చేయడంతో ఒక పేద రైతు కుటుంబంలో తీవ్ర విషాదం నిండింది. వికారాబాద్ జిల్లా దారుర్ మండల పరిధిలో ఆదివారం కురిసిన ఉరుములు, మెరుపులతో కూడిన భారీ వర్షానికి పిడుగుపడి.. ఏకంగా 11 మేకలు అక్కడికక్కడే మృత్యువాత పడ్డాయి.
అసలేం జరిగిందంటే..?
దారుర్ మండలంలోని రుద్రారం గ్రామానికి చెందిన కంది భీమయ్య అనే రైతు ప్రతిరోజూ లాగే ఆదివారం కూడా తన మేకల మందను మేత కోసం గ్రామ శివారుకు తీసుకెళ్లాడు. అయితే, మధ్యాహ్న సమయంలో అకస్మాత్తుగా వాతావరణం మారిపోయి ఉరుములు, మెరుపులతో కూడిన వర్షం ప్రారంభమైంది. ఈ క్రమంలోనే ఒక్కసారిగా పెద్ద శబ్దంతో మేకల మందపై పిడుగు పడింది. ఈ ప్రమాదంలో భీమయ్యకు చెందిన 11 మేకలు అక్కడికక్కడే ప్రాణాలు కోల్పోయాయి.
రూ. 1.80 లక్షల నష్టం.. ఆదుకోవాలని వేడుకోలు!
చనిపోయిన మేకల విలువ సుమారు రూ. 1,80,000 వరకు ఉంటుందని బాధితుడు కన్నీరుమున్నీరవుతున్నాడు. కేవలం ఈ జీవాల పైనే ఆధారపడి తన కుటుంబాన్ని పోషించుకుంటున్నానని, ఇప్పుడు పిడుగుపాటు తన జీవనాధారాన్ని దెబ్బతీసిందని రైతు భీమయ్య ఆవేదన వ్యక్తం చేశాడు. ప్రభుత్వం, పశుసంవర్ధక శాఖ అధికారులు వెంటనే స్పందించి, ప్రమాద స్థలాన్ని పరిశీలించి తమకు తగిన ఆర్థిక సహాయం అందించి ఆదుకోవాలని బాధితుడు వేడుకుంటున్నాడు.
